”૩ ઇડિયટસ”- film reviews –

– તમે પણ કહેશો કે ઓલ ઇઝ વેલ –

” All is well ” કહેવાથી સમસ્યા હલ નથી થતી પરંતુ એનાથી સમસ્યા સામે લડવાની હામ તો જીગરમાં ચોક્ક્સ ઉભી થાય જ છે.એવું કહી દરેકમા આશાનો,શકિતનો મંત્ર ફુકતો રેન્ચો (આમીરખાન) દુનિયાથી થોડો નિરાળો,રીત-રસમ કે સિસ્ટ્મથી પર એન્જીનીયરીંગ કોલેજમાં ભણતો તેજસ્વી છે.પણ પુસ્તકીય કીડો નથી. કોલેજમાં હંમેશા ટોપ કરતો રેન્ચો  ગ્રેજયુએશન પછી અચાનક ગાયબ થઇ જાય છે.અને એને શોધવા નિકળે છે એનાબે જીગરી મિત્ર રાજુ રસ્તોગી (શરમન જોષી) અને ફરહાન (આર.માધવન).રેન્ચોની એ શોધ સફર સાથે શરુ થતી બીજી એક ભૂતકાળની સફરે ખોવાયેલા એ મિત્રોની યાદમાંથી ખુલતી કથા એટલે ”૩ ઇડિયટસ.”-

ચેતન ભગતની ” Five Poin Some One ” ના મૂળ પરથી  પ્રોડયુસર વિધુ વિનોદ ચોપરાની ,રાજકુમાર હીરાનીની પટકથા અને દિગદર્શિત ચોપરાની ”૩ ઇડિયટ” ફિલ્મ નામથી એક કોમેડી ફિલ્મની ભ્રાતિ ઉભી કરે છે પણ કોલેજની એ મસ્તી,તોફાનો પાછળ એક હ્રદયસ્પર્શી સંદેશ અપાયેલો છે.સામાન્ય રીતે ડીગ્રી અને નોકરી માટે ભણતર અથવા તો ભણવાતા માતા-પિતા સામે એક રેડ સિગ્નલ છે. સફળ થવા માટે ભણવા કરતાં જેમાં રસ છે તે ભણશે તો સફળતા આપ મેળે તમને શોધતી આવશે એવો સંદેશ સાથે મિત્રોના પરિવાર સામે જોડાયેલી લાગણીભીની ક્ષણો પણ અહીં છે.

”તારે જમી પર” પછી સ્મૃતિમાંથી માંડ ઝાંખો થયેલો અને વર્ષ એક વાર દેખા દેતો આમીરખાને ફરી એકવાર આખાય વર્ષ માટે સ્મૃતિપટ પર છવાયેલો રહેશે.સીસ્ટમ સામે રોષ ધરાવતા રેન્ચોની અન્ય તરફની સહ્રદયતા આમીરે અતિ સચોટ રજુ કરિ છે. હળવી મસ્તીભરી પળોની સાથે આંખને ભીની કરી દેતી ક્ષણોમાં આમીરની સાથે આર.માધવન અને શરમન જોષી પણ એટલાજ ખરા ઉતરે છે.કરીનાકપુરે પણ પોતાના ફાળે આવેલા પાત્ર (પ્રિયા) ને ન્યાય આપ્યો છે.

આથી વિશેષ કોલેજના હેડ અને સીસ્ટ્મમાં બંધાયેલા  બોમન ઇરાનીનું પાત્ર મનમાં રોષ ઉભો કરે તેવું છે.અને એનું કારણ પણ બોમન ઇરાની નો એટલે જ સચોટ અભિનય છે.

કોલેજના ધમાલ- મસ્તીભર્યા સાહજીક વાતાવરણમાંથી ઉભી થતી મિત્રતા, મૈત્રીની સંવેદનાઓ , સિમલા લડાખની અત્યંત સુંદર સિનેમેટોગ્રાફી , ક્યારેક મસ્તી તો ક્યારેક ભાવવાહી ગીત- શાતનુ મોઇત્રાનુ સંગીત , રાજકુમાર હિરાની નું પરફેક્ટ દિગદર્શન , અને મનને સ્પર્શી  જતા અભિનયથી ભરપુર ” ૩ ઇડિયટસ ” ફિલ્મ યુવા વર્ગ માટે મનોરંજન  ઉપરાંત વડીલો માટે અતિ મહત્વનો સંદેશ આપતી આ વર્ષની અતિ સુંદર ફિલ્મ બની છે.

કલાકાર-આમીરખાન,કરીના કપૂર,શરમન જોષી, આર. માધવન,બોમન ઇરાની.

પ્રોડયુસર – વિધુ વિનોદ ચોપરા.

ડાયરેકટર-રાજકુમાર હિરાની

મ્યુઝિક– શાતનુ મોઇત્રાનુ

એક્ટિંગ–* * * * * મ્યુઝિક-* * *  સ્ટોરી-* * * * *એકશન-* * * * સિનેમેટોગ્રાફી-* * * **

“આ લેખ/ રિવ્યુ દિવ્યભાસ્કર ની પૂર્તિ સિટી ભાસ્કર માટે લખ્યો અને ૨૬/૧૨/૨૦૦૯ ના પ્રગટ થયો.”

*****