“વોશીંગ્ટન ડી સી”

દુનિયાની મહાસત્તા કહેવડાવતા અમેરિકાનું કેપીટલ  વોશીંગ્ટન ડી સી   યુ એસ ના  પુર્વીય કોસ્ટ પર વર્જીનીયાસ્ટેટમાં પોટૉમેક રિવર પર વસેલુ મેટ્રૉપોલીટન સિટી છે જે ભૌગોલિક રીતે ફ્લેટ લેન્ડ્સ્કેપ ધરાવે છે. અને તેમ છતાં તેની આસપાસ કેટલાક નાના મોટાપર્વતીય વિસ્તારો અને ખીણોનો  ઘેરાવો ધરાવે છે. ૧૭૯૦માં પ્રેસીડન્ટ વોશીંગ્ટને આ શહેરને પ્લાન કર્યુ  અને તેથી જ તે વોશીંગ્ટન ડી સી તરિકે ઓળખાયુ. આજનું વોશીંગ્ટન ડી સી અનેકવિધતા અને અનેક ભિન્નતા ધરાવતું શહેર  ગણાય છે. અત્યંત વ્યવસ્થિત રીતે ડિઝાઇન થયેલા આ શહેરમાં  અત્યંત પહોળા એવન્યુ, ભવ્ય બિલ્ડીંગ અને સ્મારકોની ભરમાર છે.  પ્રવાસીઓ ને વોશીંગ્ટન ડી સી અનેક ઐતીહાસિક તેમજ એજ્યુકેશનલ ,કલ્ચરલ તેમજ એન્ટરટેઇનમેન્ટ એક્ટીવીટી ધરાવતા સ્થળોની સફર કરાવે છે.

વ્હાઇટ હાઉસ–સૌથી પ્રથમ શરૂઆત કરી અમે વોશીંગ્ટન ડી સી જ નહીં પણ અમેરિકામાં પણ સૌથી મહત્વ ધરાવતા પ્રેસીડન્ટ્ના રેસીડન્ટ તેમજ ઓફીસ ધરાવતા વ્હાઇટ હાઉસથી. ૧૬૦૦ પેન્સીલવેનીયા એવન્યુ પર સ્થિત આ વ્હાઇટ હાઉસ બંધાવાની શરૂઆત થઈ ૧૭૯૨ ૧૩ ઓક્ટોબરે. ગવર્નર બિલ્ડીંગમાં સૌથી પ્રથમ બિલ્ડીંગ ગણાતા આ  ૬ માળના બિલ્ડીંગમાં બે માળી બેઝમેન્ટથી માંડીને ત્રીજા માળ સુધી યુ એસના  પ્રેસીડન્ટ્ની ઓફિસ અને રહેણાકની ગોઠવણ થયેલી છે. બાહ્ય રીતે બંધારણમાંકોઇ ફેરફાર ન ધરાવતા આ વ્હાઇટ હાઉસમાં લગભગ દરેક પ્રેસીડન્ટ પોતાના અંગત ક્વાર્ટરમાં ફેરફાર કરાવતા આવ્યા છે. અહીંની સુરક્ષાની જવાબદારી યુનાઇટેડ સ્ટેટ સીક્રેટ સર્વીસ  અને યુનાઇટેડ સ્ટેટ પાર્ક પોલીસની છે. ૯/૧૧ ના એટેક પછી બાન થયેલી ટુર ત્યારબાદ ૨૦૦૩માં ફરી ખુલ્લી મુકાઇ છે. અત્યંત કડક સુરક્ષા વચ્ચેની આ ટુર ફ્રી ઓફ ચાર્જ છે.  ક્રીસમસમાં વ્હાઇટ હાઉસ ની રોનક એક્દમ અનોખી હોય છે .અનેક પ્રવાસીઓ આ સમયે વોશીંગ્ટન ડી સીમાં હાજર હોય તો તેની અવશ્ય મુલાકાત લેવાનું ચુકતા નથી.

યુ એસ કેપીટલ બિલ્ડીંગ — યુ એસ ના સેનેટ અને હાઉસ ઓફ રિપ્રેઝેન્ટેટીવની મીટીંગ ચેમ્બર ધરાવતું આ બિલ્ડીંગ વોશીંગ્ટન ડી સીનુ ઐતિહાસિક બિલ્ડીંગ તરિકે ઓળખ પામ્યુ છે. નેશનલ મોલની વિરૂધ્ધ દિશાના અંત તરફ આવેલુ આ સ્મારક ૧૯મી સદીનુ અતિ પ્રભાવી અને પ્રખ્યાત મોન્યુમેન્ટ ગણાય છે.કેપીટલ બિલ્ડીંગની ટુરના વેઇટીંગ સમય દરમ્યાન અહીં કોંગ્રેસ લાયબ્રેરી અને રાષ્ટ્રીય આર્કાઇવઝ ની ગેલેરી જોવાની તક મળે છે. ટૂરની શરૂઆતમાં અમેરિકન રાજ્ય અને કોંગ્રેસના ઇતિહાસની ફિલ્મ દ્વારા માહિતિ આપવામાં આવે છે.

યુ એસ સુપ્રિમ કોર્ટ- મૂળ વોશીંગ્ટન ડી સીના રાજ્યની ધારાસભાના મકાન( કેપીટલ બિલ્ડીંગ) માં સ્થિત આ બિલ્ડીંગ ૧૯૩૫માં તેના નજદીકી કોંગ્રેસીયલ બિલ્ડીંગ ને સમાન કોરિન્થીયન શૈલી થી તૈયાર કરવામાં આવ્યુ. આ બિલ્ડીંગના આગળના ભાગમાં જસ્ટીસ અને કાયદાના સંરક્ષક સતાધિકારીના સ્ટેચ્યુ મુકવામાં આવ્યા છે. સમગ્ર વર્ષ દરમ્યાન સવારે ૯ થી ૪ વાગ્યા સુધી ખુલ્લા રહેતા આ બિલ્ડીંગની મુલાકાત માટેનો સમય ૧૦ થી ૩ સુધીનો છે  અને મર્યાદિત માત્રામાં મુલાકાતીને લેવામાં આવતા હોવાથી   હોવાથી વહેલા તે પહેલાના ધોરણે પ્રવેશ મળે છે.

સ્મીથ સોનિન્યન મ્યુઝીમ - દુનિયાના શ્રેષ્ઠ  મ્યુઝિયમોમાં જેની ગણતરી થાય તેવા અહીંના મ્યુઝિયમની મુલાકાત માટે જો રસ હોય તો એક કે બે દિવસ કરતાં વધુ દિવસ ફાળવવા પડે તેટલી  વિવિધતા  જોવા મળે .નાનકડા જીવ -જંતુથી માંડીને અવકાશયાન -અવકાશી પદાર્થો સુધીની રેન્જ જોવા મળે .૧૯ જેટલા મ્યુઝિયમમાં લગભગ ૧૩૭ મિલિયન  જેટલી  ચીજ -વસ્તુઓનુ એક્ઝીબીશન  ક્રરવમાં આવ્યુ છે. અને તેની મુલાકાત માટે કોઇ ચાર્જ નથી.

જ્યોર્જ ટાઉન -વોશીંગ્ટન ડી સીની  બાજુનુ શહેર  કોલોનિયલ સમયનુ અતિ મહત્વ પોર્ટ અને કમર્શિયલ સેન્ટર ગણાતુ.. આજે આ જ્યોર્જ ટાઉન વિવિધ કોમ્યુનીટી , શોપ, બાર રેસ્ટોરન્ટથી ધમધમતુ શહેર ગણાય છે. લગભગ ૨૦૦ વર્ષ જૂના મકાનોને અહી પુનઃ સ્થાપિત કરીને સુંદર ગાર્ડન  સાથે રો -હાઉસમાં પલટવામાં આવ્યા છે.

સી એન્ડ ઓ ( ચેસપેક અને ઓહાયો ) કેનલ - નેશનલ હિસ્ટૉરિક પાર્ક  નામે ઓળખાતો આ પાર્ક ૧૮મી સદીના ઇતિહાસની રસમય ગાથા ધરાવે છે.

કેનેડીસેન્ટર-

પરફોર્મીંગઆર્ટ અને એન્ટરટેનમેન્ટ પ્રાધાન્ય ધરાવતા આ જ્હોન એફ કેનેડી સેન્ટરમાં વર્ષ દરમ્યાન લગભગ જુદા જુદા ૩,૦૦૦ જેટલા પર્ફોર્મન્સ યોજાતા હોય છે. નેશનલ સીમ્ફની ઓર્કેસ્ટ્રા, વોશીંગ્ટન ઓરકેસ્ટ્રા , વોશીંગ્ટન બેલે  અને અમેરિકન  ફિલ્મ ઇન્સ્ટીટ્યુટ નુ મુખ્ય ધામ કહેવાતા આ  કેનેડી સેન્ટરમાં  મ્યુઝીક -ડાન્સ ઓરકેસ્ટ્રા તેમજ મલ્ટી મીડીયાને લગતા વિવિધ શો યોજાય છે.

ગ્રેટ ફોલ પાર્ક - પોટોમેક રીવરના તટે સ્થિત આ ૮૦૦ એકરનો પાર્ક મેટ્રોપોલિટન સિટીમાં અલગ તરી આવતો સૌથી અદભૂત અને અવશ્ય જોવા -જાણવા-માણવા જેવો લેન્ડ્માર્ક છે. પ્રવાસીઓ જ નહી પણ અહીંના રહેવાસીને આકર્ષતા આ પાર્કમાં  પદયાત્રા, પિકનીક , કાયેકીંગ, રોક ક્લાઇમ્બીંગ , સાઇક્લિંગ , હોર્સ રાઇડીંગ જેવી અનેકવિધ પ્રવ્રુત્તિની લહેજત માણી શકાય છે.

જ્યોર્જ વોશીંગ્ટન માઉન્ટન વર્નન એસ્ટેટ અને ગાર્ડન - વર્જીનિયાના પોટોમેક નદી  તટે આવેલુ  આ અત્યંત મનોહર -રમણીય સ્થળ ભવ્ય ઇમારતો .ગાર્ડન અને મ્યુઝિયમ ધરાવે છે. અહી અમેરિકા ના સૌ પ્રથમ પ્રેસીડન્ટ અને તેમના પરિવાર વિશે ન જાણેલી માહિતિ ઉપલબ્ધ છે.

ઓલ્ડ ટાઉન એલેક્ઝાન્ડ્રીયા - પોટોમેક નદીની બીજી તરફ આવેલુ આ પૌરાણિક શહેર એલેક્ઝાન્ડ્રીયા ૧૭મી સદીમાં મહત્વનુ કોલોનિયલ પોર્ટ ગણાતું. સિવિલ વોર અને ક્રાંતિના સમયનુ આ પૌરાણિક શહેર આજે કોલોનિયલ હાઉસ ,ચર્ચ , મ્યુઝીયમ ,રેસ્ટોરન્ટ અને વિવિવ્ધ શોપ સાથે પ્રવાસીઓ ને આકર્ષે છે.

આર્લીંગ્ટન નેશનલ સેમેટરી( કબ્રસ્તાન)- નામ સાંભળતા તો એમ થાય કે કબ્રસ્તાનમાં શુ જોવાનું ,પણ આ અહિં કોઇ ભૂતિયુ વાતાવરણ તો હતું જ નહી. ચોમેર હરીયાળી વચ્ચે એક અનોખો અનુભવ હતો. અમેરિકન સિવીલ વોર દરમ્યાન સ્થાપિત વોશીંગ્ટન ડી સી અને પેન્ટાગોન ની નજીક આવેલી આ સેમેટરી ૬૨૪ એકર જેટલો એરિયા ધરાવે છે. ડીપાર્ટમેન્ટ ઓફ આર્મી દ્વારા  અનુસાશિત આ સેમેટરીમાં કેટલાક નામી -અનામી લશ્કરી હોદ્દેદારો ની દફન વિધિ તો થઇ છે સાથે અમેરિકાના સૌથી જાણીતા અને માનીતા પ્રેસીડન્ટ જ્હોન એફ કેનેડી, તેમેના પત્નીની પણ સમાધિ જોવા મળી. સેમેટરીમાં પ્રવેશતા પહેલાં  વીઝીટર સેન્ટરમાં  અહીનો નકશો, ગાઇડ,   અહિના પ્રદર્શનની માહિતિ ઉપ્લબ્ધ હોય છે. ૧૫૦૦ સીટ્ની કેપેસીટી ધરાવતુ એમ્ફિથીયટર એ વળી  અહિંનુ એક બીજુ આકર્ષણ .

વોશીંગ્ટન મોન્યુમેન્ટ - સૌથી છેલ્લા અને અતિ મહત્વના વોશીંગ્ટન મોન્યુમેન્ટ સુધી પહોંચવા માટે સૌથી વિકટ સમસ્યા પાર્કીંગની છે.  યુ એસ ના પ્રથમ પ્રેસીડન્ટ જ્યોર્જ વોશીંગ્ટનના નામથી ખ્યાત આ મોન્યુમેન્ટ ૨૨ ફેબ્રુઆરી ૧૮૮૫માં સમર્પિત થયું.  વોશીંગ્ટનનુ સૌથી ઉંચુ અને અખંડ પથ્થરનુ બનેલુ દેખાતુ પણ માર્બલ, ગ્રેનાઇટ અને સેન્ડ્સ્ટોનનુ બનેલુ આ  ઇજીપ્શયન શૈલીનુ સ્મારક સ્તંભ ૫૫૫ ફીટ( ૧૬૯,૨૭૪ મીટર) ઉંચાઇ ધરાવે છે.  મૂળે ૮૯૭ જેટલા પગથીયા ચઢીને  ટોપ પર પહોંચાતા આ સ્મારકમાં ત્યાબાદ સ્ટીમ એલીવેટર મુકાયુ હતુ જેના થકી ૨૦ મિનિટે ટોપ પર જઈ શકાતુ. હાલમાં લગભગ ૮૦૦,૦૦૦ મુલાકાતીઓ વર્ષ દરમ્યાન અહિંની મુલાકાત લે છે.અને એક વાર એની ઉંચાઇએ પહોંચો એટલે ૩૦ માઇલ સુધીનો  દેખાતો વોશીંગ્ટન ડીસી નો નજારો કેવો હોઇ શકે તે તો કલ્પનાતિત છે.

લ્યુરે કેવ- વોશિંગટનથી બાય રોડ ફરવામાં એક બીજો ફાયદો એ થયો કે તેની આસપાસના કેટલાક સરાઉન્ડીંગ જોવા મળ્યા. એમાંનો એક તે લ્યુરે કેવ.. વર્જીનીયા માં આવેલો આ કુદરતનો અદભૂત કરીશ્મા જોવાનો રોમાંચ આજે પણ અકબંધ છે. યુ એસ માં માનવ સર્જીત અજાયબી તો ઘણી જગ્યાએ જોવા મળે પણ  આ નેચરલ લેન્ડ્માર્ક માં તો  જે વિપુલ પ્રમાણમાં અને વિવિધ ફોર્મેશન જોયા તે ખરેખર અદભૂત જ હતા.ખડકાળ પથરીલી ગુફામાં ક્યાંકથી પાણી ઝરવા અને ઝમવાથી અને અતિશય ઠંડકના લીધે તે  પાણી જામી જવાથી જે ક્રીસ્ટલના જુદા જુદા આકારો બંધાતા હતા અને તેમાં લાઇટ ઇફેક્ટથી અનેરી આભા ઉપસતી હતી તે જોઇને દિગ્મુઢ થઈ જવાય. ગુફામાં જવાનો તૈયાર કરેલો લાઇટેડ માર્ગ, ચર્ચ સાઇઝ જેવા રૂમ અને છત તો જાણે ૧૦ ફુટે આંબતી હોય તેવી અને તેમાંથી ઉત્પન્ન થતો કોઇ ચોક્કસ પ્રકારનો ધ્વનિ લ્યુરે કેવની વિઝીટને યાદગાર બનાવી રહ્યો હતો.

જાણવા જેવુ–

ફરવા માટે-

“વોશીંગ્ટન ડી સી”  જોવા માટે ગાઈડેડ ટુર લઈ શકાય. વોશીંગ્ટન ડી સી માં પાર્કીંગ માટે જગ્યાનો અભાવ હોવાથી  ફરવા માટે   બસ ટ્રેન ઉત્તમ સગવડ છે ..સાથે મેપ હોય તો ફરવામાં વધૂ અનુકૂળતા રહે.

વ્હાઇટ હાઉસ ટુર માટે ઓછામાં ઓછા ૩૦ દિવસ પહેલા કોંગ્રેસ મેમ્બર દ્વારા મુલાકાત માટે પરવાનગી લેવી જરૂરી છે.

વોશિંગ્ટન મોન્યુમેન્ટ જવા માટે અગાઉથી ઓન લાઇન બુકીંગથી ચોક્કસ સમય લઈ શકાય .

ક્યાં રહેશો-

રહેવા માટે  સૌથી કિફાયતી મોટેલ છે.

“આ આલેખન દિવ્યભાસ્કર ની પૂર્તિ દિવ્યભાસ્કર  Sunday-”યાત્રા માટે લખ્યો અને __૧૪/ ૦૩/૧૦ ના પ્રગટ થયો.“